Botimi në shqip i biografisë së Skënderbeut nga Oliver Jens Schmitt
 
Një nga veprat më të rëndësishme të historiografisë europiane mbi figurën e Gjergj Kastriotit - Skënderbeut, vjen në gjuhën shqipe në një botim cilësor nga shtëpia botuese Dora D’Istria. Biografia e shkruar nga historiani dhe profesori i Universitetit të Vjenës, Oliver Jens Schmitt, është vlerësuar gjerësisht në qarqet akademike jo vetëm perëndimore si një nga trajtesat më të thelluara dhe më të balancuara për heroin kombëtar shqiptar, një figurë që për shekuj ka frymëzuar historinë, letërsinë dhe kulturën europiane.
 
Në këtë vepër monumentale, Schmitt ndriçon Skënderbeun jo vetëm si prijës ushtarak dhe simbol i rezistencës shqiptare kundër Perandorisë Osmane, por edhe si një personalitet kompleks i kohës së tij - strateg politik, diplomat dhe menaxher financiar që mbante lidhje me bankat më të mëdha italiane të kohës, si Pazzi, Strozzi e Albizzi. 
Historiani Schmitt hedh dritë mbi dimensionin ekonomik të sundimit të tij, duke përshkruar se si Skënderbeu siguronte armatime përmes kredive të bankave raguziane dhe tregtisë me drurin e maleve shqiptare.
 
Nëpërmjet burimeve arkivore, autori sjell figura që bashkëpunuan me Skënderbeun si familja aristokrate Gondola (Gunduliq) nga Dubrovniku, që luajti një rol kyç në ndërtimin e kështjellës së Rodonit dhe në marrëdhëniet diplomatike të Arbërisë me qytetin e Raguzës. Këto detaje e nxjerrin Skënderbeun nga kufijtë e mitit dhe e vendosin në kontekstin real të Rilindjes Europiane, ku ai u bë simbol i lirisë dhe i unitetit europian.
 
Schmitt ndalet edhe në jehonën që figura e Skënderbeut pati në Europë: nga Papa Piu II dhe kompozitori Antonio Vivaldi, që i kushtoi një operë, deri te kryeministri britanik Benjamin Disraeli, i cili më 1833 shkroi romanin The Rise of Iskandar. Skënderbeu u bë kështu një figurë e përbashkët e kulturës europiane, e përjetësuar në biografi, piktura, pjesë teatrale e përmendore të shumta.
 
Autori thekson:“Nuk jam përpjekur ta çmitizoj Skënderbeun, por ta përshkruaj ashtu siç ishte - Zot i Arbërisë dhe figurë madhështore. Ai e meriton pozitën që ka në historinë shqiptare”.
Kjo biografi nuk është vetëm një libër për të kaluarën, por edhe një ftesë për reflektim mbi mënyrën se si shqiptarët e sotëm e kuptojnë trashëgiminë e tyre historike. Schmitt e vendos Skënderbeun në një dritë të re - si njeri i epokës së vet, i ndërthurur me rrjetet politike, tregtare dhe kulturore të Europës së shekullit XV.