Më 17 shkurt 2008, Kosova shpalli pavarësinë, duke u bërë shteti i shtatë që doli nga shpërbërja e Jugosllavisë. Një vend i vogël me vetëm dy milionë banorë, 90 për qind e të cilëve janë shqiptarë etnikë, Kosova ka një rëndësi qendrore - gjeografikisht, historikisht dhe politikisht - për të ardhmen e Ballkanit Perëndimor dhe, në mënyrë të tërthortë, për të ardhmen e mundshme të tij brenda Bashkimit Europian. 

Në “Kosova: Çfarë duhet të dijë secili”, publicisti britanik dhe korrespondenti shumëvjeçar nga Ballkani Tim Judah ofron një udhëzues të qartë dhe të drejtpërdrejtë për Kosovën. Ai jep përgjigje të shkurtra dhe depërtuese për një gamë të gjerë pyetjesh: Pse është Kosova e rëndësishme? Kush janë shqiptarët? Kush janë serbët? Pse Kosova ka rëndësi kaq të madhe për shqiptarët dhe serbët? Çfarë roli luan Kosova në rajon dhe në botë? 

Judah shpalos situatën politike dhe paraqet historinë e dinamikat gjeopolitike që kanë çuar deri këtu. Më kryesorja prej tyre është çështja e të drejtës për vetëvendosje, të cilën e pretendojnë shqiptarët e Kosovës, kundrejt së drejtës për integritet territorial, të cilën e mbrojnë serbët. Shqiptarët janë të bindur se e drejta e tyre për pavarësi është korrigjim i një padrejtësie historike: pushtimi i Kosovës nga serbët në vitin 1912.

Për këdo që dëshiron të kuptojë si historinë, ashtu edhe të ardhmen e Kosovës në këtë moment kyç të historisë së saj, ky libër ofron një pasuri njohurish dhe informacionesh.